समाज

बाल सुधारगृहको ३ तला माथिबाट हाम्फालेर ३ जना फरार

1624716017.biratnagar balsudhar griha.jpg
विराटनगरस्थित बालसुधार गृह 

विराटनगर- बालसुधार गृहबाट ३ जना फरार भएका छन्। तीन तलामाथिबाट हामफालेर एकैपटक १९ वर्षसम्मका चार जना भाग्ने प्रयास गरेकामध्ये एक जनालाई भने प्रहरीले तत्कालै नियन्त्रणमा लिएको छ। शनिबार बिहान राती अन्दाजी ३ बजेतिर उनीहरू भागेको सुधार गृहले जानकारी दिएको छ।

भाग्दाभाग्दै पक्राउ परेका बालक झापाका स्थायी बासिन्दा हुन्। उनलाई जबरजस्ती करणी मुद्दामा अदालतले १० वर्ष कैद सजायको फैसला गरेको छ। 

भागेका तीन जना भने शनिबार साँझसम्म पनि फेला नपरेको सुधारगृह प्रमुख मिलन चौहानले जानकारी दिए। सङ्खुवासभा, उदयपुर र ओखलढुङ्गा घर भएका तीन जना फरार बनेका हुन्। 

'शनिबार बिहान राति अन्दाजी तीन बजेतिर एकैपटक चार जना सुधारगृहको तीन तला माथिबाट हामफालेर भाग्दै गरेको देखियो। भागेकामध्ये दुई जना जबर्जस्ती करणी मुद्दामा अदालतले दोषी ठहर गरेपछि कैद सजाय भुक्तान गरिरहेका अभियुक्त हुन्,' चौहानले भने, 'अदालतले एक जनालाई १२ र एक जनालाई पाँच वर्ष कैद सजायको फैसला सुनाएको छ।'

भागेका तीनै जनाको खोजी तीव्र पारिएको चौहानले बताए। उनीहरूमा कोरोना भाइरसको संक्रमण पुष्टि भएकाले उपचारका लागि आइसोलेसन भर्ना गरिएको थियो। गृहका प्रमुख चौहानले कोरोनामुक्त भएपछि तत्काललाई छुट्टै हलमा राखिएको अवस्थामा गृहको कमजोर भौतिक संरचनाको फाइदा उठाउँदै उनीहरू भागेको उनको भनाइ छ।

प्रदेश १ मा बालविज्याइँ र कानुनी द्वन्द्वमा मुछिएका बालकहरुलाई राख्नका लागि विराटनगरमा ५० जना क्षमताको बालसुधार गृह छ। तर अहिले गृहमा झन्डै चार गुणा बढी (१९५ जना)लाई राखिएको छ। चौहानका अनुसार ९ वटा कोठा र एउटा हल रहेको गृहमा एउटा कोठाभित्र २५ जनासम्मलाई राख्नु परिरहेको छ। 
 

प्रतिक्रिया दिनुहोस्
थप समाचार
लेखकबाट थप
ताजा अपडेट
सर्वाधिक पढिएको